Agashami gashinzwe gufata neza umusaruro gafite inshingano zo gushyira mu bikorwa politiki y’ubuhinzi y’igihugugashingiye kuri Gahunda y’Igihugu y’Iterambere ry’Ubuhinzi (PSTA). Aka gashami kibanda ku guteza imbere n’isakazabumenyi mu gufata neza umusaruro nyuma yo gusarura hagamijwe kugabanya igihombo, kuzamura ubwiza bw’umusaruro no kongera umusaruro mu bwiza no mu bwinshi ukenewe ku masoko,
Aka gashami kagizwe n’ibice bibiri;
igice cya mbere kibanda ku gufata neza umusaruro binyuze mu kubungabunga ibikorwaremezo byo gufata neza umusaruro, guteza imbere isangizabumenyi mu gufata neza umusaruro.
agace ka kabiri kibanda ku bushakashatsi mu gutunganya umusaruro w’ubuhinzi, ubuziranenge no kubungabunga intungamubiri z’ibikomoka ku buhinzi.
Mu kwesa intego zako, aka gashami gafatanya n’abafatanyabikorwa batandukanye barimo abahinzi, za Minisiteri zitandukanye n’inzego zizishamikiye ho, inzego z’ibanze, imiryango itegamiye kuri Leta, abikorera, abafatanyabikorwa b'imbere mu gihugu no mu mahanga.
Gahunda yo gutunganya Ibikomoka ku Bihingwa n’Ubuziranenge bw’Ibiribwa
Iyi gahunda ikora ubushakashatsi ku gutunganya ibikomoka ku bihingwa, kongerera agaciro umusaruro, ubuziranenge bw’ibiribwa, no kubungabunga intungamubiri z’ibiribwa bikomoka ku buhinzi hagamijwe kuzamura ireme ry’ibiribwa no kongera igihe umusaruro umara utarangirika. Ibikomoka ku bihingwa bitunganyijwe bishobora gukoreshwa mu nganda z’ibiribwa, bigafasha kongera inyungu n’amahirwe ku isoko.
Iyi gahunda kandi itegura uburyo n’amahugurwa agenewe abahinzi n’amakoperative ku ikoranabuhanga ryo gutunganya umusaruro, ibipimo by’ubuziranenge bw’ibiribwa, no kumenya no kurwanya uburozi bwa aflatoxin na fumonisin. Ikindi kandi iteza imbere imirire myiza binyuze mu gukoresha ibiribwa bikungahaye ku ntungamubiri, ubuhinzi bushingiye ku mirire, ndetse no gukora imyiyerekano y’uburyo bwo guteka indyo yuzuye.